អន្តរជាតិ៖ ប្រធានវិទ្យាស្ថានអាមេរិកនៅតៃវ៉ាន់ លោកស្រី Sandra Oudkirk បានអះអាងថា ទីក្រុងប៉េកាំងបានធ្វើឱ្យខូចសន្តិភាពក្នុងតំបន់។ លោកស្រី Oudkirk បានស្តីបន្ទោសទីក្រុងប៉េកាំងអំឡុងពេលថ្លែងសុន្ទរកថា នៅឯសភាពាណិជ្ជកម្មអាមេរិក កាលពីថ្ងៃពុធ ដោយបង្ហាញពីគោលនយោបាយរបស់ខ្លួនចំពោះតៃប៉ិ។

គាត់បាននិយាយថា៖ «អាកប្បកិរិយាឈ្លានពានរបស់ [ចិន] កាន់តែមានភស្តុតាង ដោយបន្ថែមថា សកម្មភាពយោធាបង្កហេតុនៅជិតតៃវ៉ាន់ គឺជាការបង្ករហេតុអស្ថិរភាព និងធ្វើឱ្យខូចសន្តិភាព ស្ថិរភាពក្នុងតំបន់»។

លោកស្រី Oudkirk បានថ្លែងចំពោះមុខប្រធានាធិបតីតៃវ៉ាន់ Tsai Ing-wen ដោយបន្តបញ្ចេញនូវ «ការព្រួយបារម្ភយ៉ាងខ្លាំង» ថាចិនអាចនឹងធ្វើតាមរុស្ស៊ីបន្ទាប់ពីការវាយប្រហាររបស់ទីក្រុងមូស្គូមកលើអ៊ុយក្រែន ដែលហាក់ដូចជាមានភាពស្រដៀងគ្នារវាងជម្លោះនៅអឺរ៉ុបខាងកើត និងភាពតានតឹងរវាងតៃវ៉ាន់ និងចិនដីគោក។

ទោះបីជាមន្ត្រីអាមេរិកបានគាបសង្កត់ទីក្រុងប៉េកាំងឱ្យផ្តាច់ទំនាក់ទំនងរបស់ខ្លួនជាមួយរុស្ស៊ី និងចូលរួមក្នុងយុទ្ធនាការដាក់ទណ្ឌកម្មក៏ដោយ ប៉ុន្តែរហូតមកដល់ពេលនេះប្រទេសចិនបានបដិសេធមិនព្រមព្រងើយកន្តើយដោយរក្សាជំហរអព្យាក្រឹតចំពោះជម្លោះខណៈជំរុញឱ្យមានការទូត និងបញ្ចប់ការប្រយុទ្ធគ្នា។

លោកស្រី Oudkirk បាននិយាយថាទីក្រុងវ៉ាស៊ីនតោននឹងបន្ត «ពង្រឹងតួនាទីរបស់តៃវ៉ាន់ជាដៃគូសន្តិសុខក្នុងតំបន់» ដែលជាផ្នែកមួយនៃការបង្កើនការផ្សព្វផ្សាយរបស់រដ្ឋបាល Joe Biden ទៅកាន់កោះនេះ។

កាលពីចុងឆ្នាំមុន លោកប្រធានាធិបតីបានប្រកាសថាសហរដ្ឋអាមេរិកប្តេជ្ញាចិត្ត ដើម្បីការពារតៃវ៉ាន់ពីការវាយប្រហារណាមួយរបស់ចិន។

សហរដ្ឋអាមេរិកក៏បានយល់ព្រមលើការលក់សព្វាវុធមួយចំនួនទៅឱ្យតៃវ៉ាន់ក្នុងរយៈពេលប៉ុន្មានខែថ្មីៗនេះ ហើយបន្តបើកនាវាចម្បាំងឆ្លងកាត់ច្រកសមុទ្រតៃវ៉ាន់ បើទោះបីជាមានការព្រមានម្តងហើយម្តងទៀតពីទីក្រុងប៉េកាំងថាមិនឱ្យជ្រៀតជ្រែកកិច្ចការផ្ទៃក្នុងរបស់ខ្លួន ៕